Puting Damit

Iyong makikita 

Sa isang makipot na daan

Ang lalaking naka-puting damit. 

Katabi ang kaniyang bisekleta 

Habang nagku-kumpuni.

Masisilayan mo ang pagkayap

ng langis sa kaniyang puting saplot

Dahil sa walang tigil na pagkalikot

Sa kagamitan na akala ng iba ay 

wala ng gamot. 

Araw at gabi

Sinusuri ang ugat ng pagkasira,

Nagsasagawa ng inspeksyon, 

At nagbibigay ng mungkahi,

Bilang kaniyang paraan

Upang maisulsi at muling magamit.

Maghapong nagpapadyak sa kalye

Upang tulungan ang kaniyang mga kliyente.

Dala ng kalamnan ay mainit na kape

Bilang lakas sa magdamag 

na pagkukumpuni. 

Di man niya nasungkit 

ang kaniyang pangarap,

Kinapos man sa pag-abot

ng inaasam, 

Dulot ng paghihirap,

May rasong handog naman 

ang hinaharap. 

Simbolismo ay puti

Sa damit na may ikinukubling 

propesyong nawaglit. 

Doktor ang pinilit na makamit 

Ngunit, sa kasalukuyan, 

Naging doktor ng mga sirang gamit. 

Hindi man gumagamot ng taong may sakit. 

Bagkus, hawak ay distornilyador at plais

Para ang sigla ng iyong kagamitan ay 

mapanumbalik.